काठमाडौँ । बुढानीलकण्ठ नगरपालिकाभित्रका बालबालिकालाई निःशुल्क तथा सहुलियतपूर्ण स्वास्थ्य सेवा उपलब्ध गराउने उद्देश्यले बुढानीलकण्ठ नगरपालिका र काठमाडौं इन्स्टिच्युट अफ चाइल्ड हेल्थ ( केआइओसीएच ) अस्पतालबीच समझदारीपत्रमा हस्ताक्षर भएको छ ।
नगरप्रमुख मिठाराम अधिकारी, उपप्रमुख अनिता लामा, प्रमुख प्रशासकीय अधिकृत अजय बर्तौला तथा केआइओसीएचका अध्यक्ष एवं वरिष्ठ मुटुरोग विशेषज्ञ डा. भगवान कोइरालालगायत दुवै संस्थाका पदाधिकारीहरूको उपस्थितिमा उक्त समझदारी सम्पन्न भएको हो ।
समझदारीअनुसार बुढानीलकण्ठ नगरपालिकाभित्रका बालबालिकालाई केआइओसीएच अस्पतालमार्फत विशेषज्ञ बालरोग उपचार सेवा निःशुल्क तथा सहुलियतपूर्ण रूपमा उपलब्ध गराउने लक्ष्य राखिएको छ । यसबाट विशेषगरी आर्थिक अवस्था कमजोर भएका तथा विशेषज्ञ स्वास्थ्य सेवाको पहुँचबाट टाढा रहेका बालबालिकालाई उपचारमा सहयोग पुग्ने अपेक्षा गरिएको छ ।
बालबालिकाको स्वास्थ्यलाई प्राथमिकतामा राख्दै गरिएको यस सहकार्यले जटिल तथा विशेषज्ञ उपचार आवश्यक पर्ने बालबालिकाको स्वास्थ्य सेवामा पहुँच विस्तार गर्न सहयोग पु¥याउने विश्वास लिइएको छ। साथै, आर्थिक अभावका कारण बालबालिकाले आवश्यक उपचारबाट वञ्चित हुनुपर्ने अवस्थालाई न्यूनीकरण गर्नसमेत यसले योगदान पु¥याउन सक्ने अपेक्षा गरिएको छ ।
स्थानीय सरकार र विशेषज्ञ स्वास्थ्य संस्थाबीचको यस सहकार्यलाई बालस्वास्थ्य सेवाको पहुँच विस्तार गर्ने महत्त्वपूर्ण पहलका रूपमा हेरिएको छ। सम्झौताको प्रभावकारी कार्यान्वयनसँगै नगरपालिकाका बालबालिकाले गुणस्तरीय स्वास्थ्य सेवा प्राप्त गर्ने अवसर थप सहज हुने अपेक्षा गरिएको छ ।
यद्यपि, निःशुल्क तथा सहुलियतपूर्ण उपचारमा समावेश हुने सेवाहरू, लक्षित बालबालिकाको योग्यता, आवश्यक सिफारिस प्रक्रिया र सेवा प्राप्त गर्ने विधिबारे विस्तृत जानकारी नगरपालिकाले सार्वजनिक गरेपछि सेवाग्राहीलाई प्रक्रिया बुझ्न थप सहज हुनेछ ।
.jpeg "शम्भूजीतलाई अभिनन्दनगर्दै संगीत समर्पण साँझमा गुन्जिए उन्नती शीलाका २५ कालजयी गीत")
