काठमाडौं । रसुवाको भोटेकोशी नदीमा आएको विनाशकारी बाढीपछि हालसम्म १ हजार १२७ जनाको शव फेला परेको छ। नेपाल प्रहरीले बुधबार बिहान ८ बजेसम्म सार्वजनिक गरेको विवरणअनुसार बाढीपछि अझै ४ हजार ८५८ जना सम्पर्कविहीन छन्।
प्रहरीका अनुसार बाढी प्रभावित विभिन्न जिल्लासहित भारतमा समेत शव फेला परेका छन्। सबैभन्दा बढी चितवनमा ३४८ जनाको शव फेला परेको छ।
त्यसैगरी नवलपरासी पश्चिममा १९०, नवलपरासी पूर्वमा २१७, नुवाकोटमा १५५, गोरखामा ६६, धादिङमा ५९, रसुवामा ४५ र तनहुँमा ३८ जनाको शव भेटिएको छ। भारतमा समेत ९ वटा शव फेला परेको प्रहरीले जनाएको छ।
फेला परेका शवमध्ये १ हजार ११३ वटाको लासजाँच मुचुल्का सम्पन्न भएको छ। हालसम्म ९५ वटा शव आफन्तलाई बुझाइएको छ। पहिचान हुन नसकेका ९११ वटा शवको विवरण प्रहरीले आफ्नो वेबसाइटमा सार्वजनिक गरेको छ।
६ हजार ५४१ जनाको उद्धार
बाढी प्रभावित क्षेत्रमा उद्धार तथा खोजी कार्य जारी छ। प्रहरीले हालसम्म ६ हजार ५४१ जनाको सकुशल उद्धार गरेको जनाएको छ।
उद्धार, खोजी, राहत वितरण, शव व्यवस्थापन तथा प्रभावितलाई सुरक्षित स्थानमा सार्न ७ हजार ९१२ जना प्रहरी कर्मचारी परिचालन गरिएको छ।
प्रहरीका अनुसार प्रभावित क्षेत्रमा जोखिममा रहेका परिवारलाई सुरक्षित स्थानमा सार्ने, अवरुद्ध सडक खुलाउने तथा स्थानीय समुदाय र अन्य निकायसँगको समन्वयमा खोज तथा उद्धार कार्य भइरहेको छ।
बेपत्ताको खोजी चुनौतीपूर्ण
बाढी आएको लामो समयपछि पनि ठूलो संख्यामा मानिस सम्पर्कविहीन रहेकाले खोजी कार्य चुनौतीपूर्ण बनेको छ। नदी किनार, बाढीले बगाएका संरचना तथा प्रभावित क्षेत्रमा सुरक्षाकर्मीले खोजीलाई निरन्तरता दिएका छन्।
फेला परेका शवको पहिचान र आफन्तलाई हस्तान्तरण गर्ने प्रक्रिया पनि सँगसँगै अघि बढाइएको प्रहरीले जनाएको छ।
बाढीपछि मृत्यु, बेपत्ता र विस्थापितको संख्या बढ्दै गएसँगै प्रभावित जिल्लामा खोजी, उद्धार, राहत तथा पुनःस्थापनाको काम थप जटिल बन्दै गएको छ।
.jpeg "काठमाडौँको गोकर्णेश्वरस्थित सरकारी वन क्षेत्रमा पनि पहिचान खुल्न नसकेका शव व्यवस्थापन")
