नेपाल प्रहरीका आधारभूत तहका कर्मचारीको गुनासो सुनुवाइका लागि "केन्द्रीय गुनासो व्यवस्थापन डेस्क" समुद्घाटन गरिएको छ। प्रहरी महानिरीक्षक डा. मनोज कुमार केसीको प्रमुख आतिथ्यमा डेस्कको औपचारिक शुभारम्भ भएको हो।
कार्यक्रममा आईजीपी केसीले सीयूजी सेवामा आबद्ध प्रहरी कार्यालय सहयोगीदेखि प्रहरी वरिष्ठ हवल्दारसम्मका ५४ हजार १२२ कर्मचारीको मोबाइलमा एकैसाथ गुनासो दर्ताको गुगल फारम लिङ्क पठाए । उनले एक प्रहरी कर्मचारीसँग टेलिफोनमार्फत प्रत्यक्ष संवाद गर्दै गुनासो पनि सुने।
प्रहरी नियमावली, २०७१ को नियम १९६ बमोजिम कार्यादेश जारी गरी स्थापना गरिएको डेस्कले कर्मचारीको पेसागत तथा सेवागत जीवनलाई सुरक्षित, सम्मानित र न्यायोचित बनाउने उद्देश्य राखेको छ। आईजीपी केसीले असमान व्यवहार र विभेदलगायतका गुनासोको निष्पक्ष सुनुवाइ गरी समयमै सम्बोधन गर्न डेस्कमा खटिएका अधिकारीलाई निर्देशन दिए।