काठमाडौं । एनएमबी बैंक लिमिटेडको नेतृत्वमा ४४० मेगावाट क्षमताको तिला–१ जलविद्युत् आयोजनाको वित्तीय व्यवस्थापन भएको छ। कालिकोट जिल्लाको तिला खोलामा एससी पावर कम्पनी प्रालिले निर्माण गर्न लागेको आयोजनाको कुल अनुमानित लागत ५९ अर्ब ४ करोड रुपैयाँ रहेको छ। कुल लागतमध्ये बैंक तथा वित्तीय संस्थाबाट ४४ अर्ब ५५ करोड रुपैयाँ ऋण लगानी हुने भएको छ ।
वित्तीय व्यवस्थापनमा एनएमबी बैंक लिमिटेड अग्रणी बैंक (लिड बैंक) का रूपमा रहेको छ। ग्लोबल आईएमई बैंक, हिमालयन बैंक र प्रभु बैंक सह–अग्रणी बैंक (को–लिड बैंक) का रूपमा सहभागी छन्। अन्य विभिन्न बैंक तथा वित्तीय संस्था सदस्य बैंक तथा वित्तीय संस्थाका रूपमा सहभागी भएका छन् ।
एससी पावर कम्पनीको मुख्य नेतृत्व सुजन कर्माचार्य तथा उनको समूहले गरेको छ। विद्युत् उत्पादन अनुमतिपत्रअनुसार आयोजनाको कुल क्षमता ४४० मेगावाट रहेको छ ।
पीपीएअनुसार आयोजनाको व्यावसायिक विद्युत् उत्पादन सुरु गर्नुपर्ने मिति वि.सं. २०८७ पुस १५ अर्थात् ३१ डिसेम्बर २०३० तोकिएको छ । वित्तीय व्यवस्थापनसम्बन्धी सम्झौतामा एनएमबी बैंकका सहायक महाप्रबन्धक दिनेश दुलाल र एससी पावर कम्पनीका अध्यक्ष सुजन कर्माचार्यले हस्ताक्षर गरेका छन् । निजी क्षेत्रको लगानी र नेतृत्वमा अघि बढाइएको यो आयोजना जडित क्षमताका आधारमा हालसम्मका ठूला जलविद्युत् आयोजनामध्ये एक हो ।
आयोजना निर्माणपछि पहिलो वर्ष करिब ११ अर्ब ४० करोड रुपैयाँ आम्दानी हुने अनुमान गरिएको छ । आयोजनाबाट उत्पादन हुने विद्युत् राष्ट्रिय प्रसारण प्रणालीमा जोडिनेछ ।
एनएमबी बैंकले नेपाल राष्ट्र बैंकद्वारा जारी वातावरणीय तथा सामाजिक जोखिम व्यवस्थापनसम्बन्धी निर्देशिकाअनुसार आयोजनाको वातावरणीय तथा सामाजिक पक्षको मूल्यांकन गरेको जनाएको छ।
बैंकले वातावरणीय तथा सामाजिक नीति तथा व्यवस्थापन प्रणाली कार्यान्वयन गर्दै लगानीका वातावरणीय तथा सामाजिक पक्षको मूल्यांकनका आधारमा जिम्मेवार तथा दिगो लगानीलाई प्राथमिकता दिँदै आएको जनाएको छ ।
यसै क्रममा तिला–१ जलविद्युत् आयोजनाको वातावरणीय, सामाजिक तथा सुशासन पक्षको प्रारम्भिक मूल्यांकनका लागि हाइड्रोपावर सस्टेनेबिलिटी एलायन्स (एचएसए) द्वारा विकसित ‘हाइड्रोसेलेक्ट टुल’ प्रयोग गरिएको बैंकले जनाएको छ।
एनएमबी बैंकका अनुसार बैंकले हालसम्म ५० भन्दा बढी जलविद्युत् आयोजनामा लगानी गरिसकेको छ। बैंकले देशभर १९७ शाखा, १७६ एटीएम तथा ९ एक्सटेन्सन काउन्टरमार्फत सेवा प्रदान गर्दै आएको जनाएको छ ।
