काठमाडौं । अभिनेत्री रेखा थापाद्वारा निर्मित तथा अभिनीत नेपाली कथानक चलचित्र ‘उपहार’ को पहिलो गीत सार्वजनिक भएको छ । ओएसआर डिजिटल युट्युब च्यानलमार्फत शुक्रबार उक्त चलचित्रको गीत ‘वाह वाह वाह’ सार्वजनिक गरिएको हो । गीतमा गायक बाबुल गिरी र गायिका एलिना चौहानको आवाज रहेको छ । सार्वजनिक गीतको भिडियोमा अभिनेत्री रेखा थापा, अभिनेता मुकुन भुषाल, बेनिशा हमाल, पूजा शर्मा, समर्पणजंग कार्की, तेज गिरी लगायतका कलाकारको अभिनय छ । शंकर अधिकारी ‘घायल’ को शब्द रचना रहेको गीतमा गायक बाबुल गिरीकै संगीत छ ।
गीतलाई कविराज गहतराजले कोरियोग्राफी गरेका हुन् । निर्माण पक्षका अनुसार ज्ञानेन्द्र देउजाले निर्देशन गरेको चलचित्रमा अभिनेत्री थापा, बेनिशा हमाल, पूजा शर्मा, मुकुन भुषाल, तेज गिरी, समर्पणजंग कार्की, शिशिर राना, अंशु थापालगायतका कलाकारको अभिनय रहने छ । यस वर्षको मिस्टर नेपाल उपाधि हात पारेका समर्पणजंग यसै चलचित्रबाट ठुलो पर्दामा पाइला टेक्दै छन् । सुलक्षण भारतीको कथा रहेको चलचित्रको सुलभ प्रतिक र समीक्षा देउजा निर्माता हुन् । यस्तै, चलचित्रका कार्यकारी निर्माता बलराम शाही ठकुरी रहेका छन् । विष्णु कल्पितको छायांकन रहेको चलचित्रलाई मित्रदेव गुरुङले सम्पादन गरेका छन् । यो चलचित्र फागुन २५ गतेदेखि देशव्यापी प्रदर्शनमा आउने तयारीमा रहेको निर्माण पक्षले जनाएको छ ।
